 | ಲಿಂಗಾಯತ ಪತ್ರಿಕೆಗಳು | 21ನೇ ಶತಮಾನಕ್ಕೆ ಲಿಂಗಾಯತ ಧರ್ಮ |  |
ಪೂಜ್ಯ ಶ್ರೀಮನ್ ನಿರಂಜನ ಮಹಾಜಗದ್ಗುರು ಲಿಂಗಾನಂದ ಸ್ವಾಮಿಗಳು. |
ಪೂಜ್ಯ ಶ್ರೀ ಲಿಂಗಾನಂದರು ವಿಶ್ವಗುರು ಬಸವಣ್ಣನವರ ಜನಿಸಿದ ಬಿಜಾಪುರ ಜಿಲ್ಲೆಯ ಬಾಗೇವಾಡಿ ತಾಲ್ಲೋಕಿನ ಮನಗೂಳಿಯಲ್ಲಿ ಗಣೇಶ ಚೌತಿಯ ೧೫ ಸೆಪ್ಟೆಂಬರ ೧೯೩೧ರಂದು ಜನಿಸಿ, ಬಿ. ಎ. ಆನರ್ಸ್ ಪದವೀಧದರರಾಗಿ, ೨೫ನೆ ಏಪ್ರಿಲ ೧೯೫೫ರಂದು ಅಧ್ಯಾತ್ಮಿಕ ಮಾನಸಾಂತರ ಹೊಂದಿ, ೧೯ ನವೆಂಬರ್ ೧೯೫೬ರಂದು ಜ್ಞಾನ ಸನ್ಯಾಸವನ್ನು ಸ್ವೀಕರಿಸಿ, ತಮ್ಮ ಕೊನೆಯುಸಿರಿರುವವರೆಗೂ ಒಂದು ದಿನವು ಬಿಡದೆ ಜ್ಞಾನದಾಸೋಹ ಮಾಡಿದ ಪಾವನ ಚೇತನ. ಪೂಜ್ಯ ಸ್ವಾಮೀಜಿಯವರ ಬರುವು ಮತ್ತು ಬದುಕು ಬಸವ ತತ್ವಕ್ಕೆ ಜೀವಾಳವಾಯಿತು ಬಸವ ಯುಗದ ಪುನರುತ್ಥಾನಕ್ಕೆ ನಾಂದಿ ಹಾಡಿದ ಚೇತನಶಕ್ತಿ ಪೂಜ್ಯರು ಎಂದರೆ ಉತ್ಪ್ರೇಕ್ಷೆಯಾಗದು.
ಶ್ರೀಗಳು ಚಲಿಸುವ ಜ್ಞಾನದೇಗುಲವಾಗಿ ಅಸಂಖ್ಯಾತ ಚೇತನಗಳಿಗೆ ಅರಿವಿನ ಬೆಳಕನಿತ್ತು ಹರಿವ ಜ್ಞಾನಗಂಗೆಯಾಗಿ, ಅಪರಿಮಿತ ಕ್ಷೇತ್ರದಲ್ಲಿ ಸಂಚರಿಸಿ ಪಾರಮಾರ್ಥಿಕ ನಂದನವನ್ನು ನಿರ್ಮಿಸಿದ ದಿವ್ಯ ಚೇತನ ಪೂಜ್ಯ ಶ್ರೀ ಮಹಾ ಜಗದ್ಗುರು ಲಿಂಗಾನಂದ ಸ್ವಾಮಿಗಳು. ತಮ್ಮದೇ ಆದ ವಾಗ್ಮಿತ್ವದಿಂದ ಎಲ್ಲರನ್ನು ಎಚ್ಚರಿಸುತ್ತ ದೀಮಂತ ವ್ಯಕ್ತತ್ವದಿಂದ ಆಕರ್ಷಿಸುತ್ತ ಜನರಲ್ಲಿ ಧರ್ಮವನ್ನು ಕುರಿತು ಶ್ರದ್ಧೆ, ಆಸಕ್ತಿ ಅಭೀಪ್ಸೆ ಹುಟ್ಟಿಸಿದ ಪ್ರತಿಭಾವಂತ ಪ್ರವಚನಕಾರರು.
ಶ್ರೀಗಳು ೧೩ನೇ ಜನವರಿ ೧೯೯೨ರ ಸೋಮವಾರದಂದು ವಿಶ್ವಗುರು ಬಸವಣ್ಣನವರ ವಿದ್ಯಾಭೂಮಿ, ತಪೋಸ್ಥಾನ, ಐಕ್ಯಕ್ಷೇತ್ರ ಕೂಡಲ ಸಂಗಮದಲ್ಲಿ ಬಸವ ಧರ್ಮದ ಮಹಾಜಗದ್ಗುರು ಪೀಠವನ್ನು ಸ್ಥಾಪಿಸಿ ಪ್ರಥಮ ಪೀಠಾಧೀಶರಾಗಿ ಆರೋಹಿಸಿ ಅಸಂಖ್ಯಾತ ಬಸವ ಭಕ್ತರಿಗೆ ಆನಂದವನ್ನು ಉಂಟು ಮಾಡಿ, ವಿಶ್ವಗುರು ಬಸವಣ್ಣನವರ ಹೆಸರಿನಲ್ಲಿ ಧರ್ಮ ಪೀಠವೊಂದು ಇರದಿರುವ ಕೊರತೆಯನ್ನು ತುಂಬಿದರು.
ಇಂತಹ ಮಹಾನ್ ಪೂಜ್ಯ ಶ್ರೀಗಳು ಜೂನ್ ೩೦ ೧೯೯೫ರಂದು ಹಿರಿಯೂರಿನಲ್ಲಿ ಪ್ರವಚನ ಕಾಯಕ ಸಾಗಿಸುವಾಗಲೇ ಲಿಂಗೈಕ್ಯರಾಗಿ ಕ್ರಿಯಾವಿಶ್ರಾಂತಿಯನೈದಿದರು.
| | ಲಿಂಗಾಯತ ಪತ್ರಿಕೆಗಳು | 21ನೇ ಶತಮಾನಕ್ಕೆ ಲಿಂಗಾಯತ ಧರ್ಮ | |