ಅಕ್ಕಮಹಾದೇವಿ ಜೋಗುಳ

ಜೋ ಅಕ್ಕಮಹಾದೇವಿ

ಜೋ ಅಕ್ಕಮಹಾದೇವಿ ವೈರಾಗ್ಯ ಮೇರು
ಜೋ ಜೋ ಶರಣ ಜನರ ಕಣ್ಮಣಿಯ ತೇಜ ||ಪ||

ಭುವಿಗಂದು ನೀ ಬಂದೆ ಓಂಕಾರ ತಂದೆಯಿಂ
ಚೆಲ್ವಿನಂಗವ ಧರಿಸಿ ಲಿಂಗಮ್ಮ ತಾಯಿಯಿಂ
ಬೆಳೆಯುತ್ತ ಬಿದಿಗೆಯ ಚಂದ್ರಮನ ತೆರದಿ
ಇಳೆಯೊಳು ಮೆರೆದೆಯೌ ಪಾರ್ವತಿಯ ತೇಜದಿ ಜೋ! || 1 ||

ಉದಮದದ ಯೌವನದ ಸೊಬಗು ವಿಕಸಿತವಾಗೆ
ಹೃದಯವು ತಾನಾಗಿ ಲಿಂಗದೇವನಿಗೊಲಿಯೆ
ಮುದಗೊಂಡು ಒಲಿದ ಕೌಶಿಕನ ತೊರೆದು
ಒದವಿ ಧರಿಸಿ ನಡೆದೆ ದಿವ್ಯ ದಿಗಂಬರವ ಜೋ! ||2||

ಏರುಂಜವ್ವನದ ಮೇರುವೆ ತರುಣಿಯೆ
ಬರುವ ಬಯಕೆ ಇರಲು ಪತಿ ಹೆಸರ ಉಸಿರು
ಎಂಬ ಪ್ರಭುವಿನ ಕಟು ಮಾತಿಗೆ ಬೆದರದೆ
ಅಂಬೆ ಉತ್ತರಿಸಿದ ದೇವಗೊಲಿದವಳೆಂದು ಜೋ! ||3||

ಅನುಭವ ಮಂಟಪದ ಶರಣರ ಅಕ್ಕನಾಗಿ
ಮೌನದಿ ಕದಳಿಯ ಸಿರಿಬನವ ಪೊಕ್ಕು
ಧನ್ಯ ಮಾಡಿದೆ ನೀನು ಬಸವ ಧರ್ಮದ ವಾಣಿ
ಮಾನ್ಯತೆಯ ಪಡೆದೆಯೌ ಸಚ್ಚಿದಾನಂದನಲಿ ಜೋ || 4 ||