ಲಿಂಗಾಯತ ನಾನು ಲಿಂಗಾಯತ
ಲಿಂಗಾಯತ ನಾನು ಲಿಂಗಾಯತ
ವಿಶ್ವಬಂಧುವು ನಾನು ವಿಶ್ವಬಂಧುವು || ಪ ||
ನನ್ನ ಧರ್ಮ ಲಿಂಗಾಯತ ಎಂದು ಸಾರಿ ನುಡಿವೆನು
ಬಸವಣ್ಣನೇ ಧರ್ಮಗುರುವು ಎಂದು ನಂಬಿ ನಡೆವೆನು
ಲಿಂಗದೇವ ಜಗದ ಕರ್ತ ಎಂಬ ಶ್ರದ್ಧೆ ಹೊಂದುತ
ವಚನ ಶಾಸ್ತ್ರ ನಮ್ಮ ನಡೆಗೆ ಧರ್ಮಸೂತ್ರವೆಂಬೆನು || ೧ ||
ಇಷ್ಟಲಿಂಗ ದೇವಕುರುಹು ಎಂದು ನಾನು ಧರಿಪೆನು
ಸಂಗಮವು ಧರ್ಮಕ್ಷೇತ್ರ ಎಂದು ತಿಳಿದು ಬರುವೆನು
ಶರಣ ಮೇಳದಲ್ಲಿ ಕೂಡಿ ಹಾಡಿ ಪಾಡಿ ನಲಿವೆನು
ಕಲ್ಯಾಣ ಪರ್ವಕೆ ಬಂದು ಜನ್ಮಧನ್ಯಗೈವನು || ೨ ||
ಷಟ್‌ಕೋನ ಬಸವ ಧ್ವಜವ ಹಿಗ್ಗಿನಿಂದ ಹಾರಿಪೆನು
ಇಷ್ಟಲಿಂಗ ದೀಕ್ಷೆ ಹೊಂದಿ ಗಣಪದವಿಯ ಹೊಂದುವೆನು
ಭಕ್ತಿ ಪಕ್ಷ ಹೊಂದಲಿಕ್ಕೆ ಬಸವ ಮಂಟಪ ಕಟ್ಟುವೆನು
ವಾರಕ್ಕೊಮ್ಮೆ ಸಾಮೂಹಿಕ ಪ್ರಾರ್ಥನೆಯ ಗೈವೆನು || ೩ ||
ಶ್ರಾವಣ ಮಾಸದಲ್ಲಿ ನಾನು ವಚನ ಪಠಣಗೈವೆನು
ಶರಣ ಭಾಷೆ ಕನ್ನಡವೆಂದು ಹೆಮ್ಮೆಯಿಂದ ನುಡಿವೆನು
ಬಸವಾದಿ ಶರಣರ ಪರಂಪರೆಯು ನನ್ನದು
ಜಾತಿ ವರ್ಣ ವರ್ಗಾತೀತ ಸಹೋದರತೆ ನಮ್ಮದು || ೪ ||
ಮರ್ತ್ಯಲೋಕ ಕರ್ತಾರನ ಕಮ್ಮಟವೆಂದೆನ್ನುತ
ದಿವ್ಯ ಗಣಲಿಂಗವು ಬೆಸೆವ ಕುರುಹು ಎಂಬೆನು
ಜಾತಿ ಸೂತ್ರ ತೊರೆದು ನಾನು ನೀತಿ ಸೂತ್ರ ಹಿಡಿವೆನು
ಧರ್ಮಸೋದರತ್ವ ಸಾರಿ ಶರಣ ಸಮಾಜ ಕಟ್ಟುವೆನು || ೫ ||
