ಶ್ರೀಸಿದ್ಧರಾಮೇಶ್ವರರ ಭಕ್ತಿ ಗೀತೆ
|
|
*
- ✍ ಪೂಜ್ಯ ಶ್ರೀ ಮಹಾಜಗದ್ಗುರು ಡಾ|| ಮಾತೆ ಮಹಾದೇವಿ.
ಶ್ರೀ ಸಿದ್ಧರಾಮೇಶ ಬದ್ಧತೆಯ ತೊಡೆವೀಶ
ಶ್ರೀ ಸಿದ್ಧರಾಮೇಶ ಬದ್ಧತೆಯ ತೊಡೆವೀಶ
ಶರಣ ಸಂದೋಹದ ಪರಮಶಿವಯೋಗೀಶ ||ಪ||
ಅನುಭವ ಮಂಟಪದ ಅಮರ ಜ್ಯೋತಿಯೆ ಆಗಿ
ಅನುಭಾವ ದೀಪ್ತಿಯನು ಹೊಮ್ಮಿಸಿದ ಸತ್ಪುರುಷ ||ಅ.ಪ||
ಸೊನ್ನಲಾಪುರದಲ್ಲಿ ಜನ್ಮಿಸಿದ ಶಿವತನುಜ
ಮೃಣ್ಮಯದ ದೇಹವಂ ಮುದ್ದುಗೌಡನಿಂ ಪಡೆದೆ
ಚಿನ್ನದಂತಹ ತಾಯಿ ಸುಗ್ಗವ್ವೆಯೊಡಲಿನಿಂ
ಚಿನ್ಮಯದ ಚೋಹವಂ ತೊಟ್ಟು ನೀ ಧರೆಗಿಳಿದೆ ||೧||
ಮೌನಯೋಗಿಯು ಆಗಿ ಬಾಲ್ಯವನು ನೀ ಕಳೆದೆ
ಧ್ಯಾನ ಲೀಲೆಯೊಳಿರ್ದು ಬಂಧನವ ಸೈರಿಸಿದೆ
ಮಲ್ಲಯ್ಯ ಮಲ್ಲಯ್ಯ ಎಂದು ಹಂಬಲಿಸುತಲಿ
ಕಲ್ಲನೊಲ್ಲದೆ ನಿಜದ ಮಲ್ಲಿನಾಥನ ಪಡೆದೆ ||೨||
ಶಿಕ್ಷಾಗುರು ಪ್ರಭುವಿನಿಂ ಆತ್ಮ ಜಾಗೃತಿ ಹೊಂದಿ
ದೀಕ್ಷೆಯಂ ಗುರು ಚೆನ್ನಬಸವೇಶನಿಂ ಪಡೆದೆ
ಮೋಕ್ಷ ಗುರು ಬಸವನ ದಿವ್ಯ ಪಥದೊಳು ನಡೆದು
ಸೂಕ್ಷ್ಮ ಶಿವಯೋಗದ ಅನುಭೂತಿಯಂ ಪಡೆದೆ ||೩||
ಶೂನ್ಯ ಪೀಠದ ಗುರುವು ನೀನಾಗಿ ಮೆರೆದೆ
ಶೂನ್ಯ ತತ್ವದ ಅರವ ಮತಿಯಲಿ ಧರಿಸಿದೆ
ವಚನದೈಸಿರಿಯ ಭಾಂಡಾರವಂ ಬಿಳೆಸಿ
ಸಚ್ಚಿದಾನಂದನ ಮೆಚ್ಚುಗೆಯ ಮಗನಾದೆ ||೪||
