ಬಸವ ಧ್ಯಾನ ಮಾಡಿರಣ್ಣಾ

ಬಸವ ಬಸವ ಬಸವಾ ಎಂದು | ಬಸವ ಧ್ಯಾನ ಮಾಡಿರಣ್ಣಾ

ಬಸವ ಬಸವ ಬಸವಾ ಎಂದು | ಬಸವ ಧ್ಯಾನ ಮಾಡಿರಣ್ಣಾ |
ಬಸವ ಧ್ಯಾನ ಮಾಡಿದರೆ | ದುರಿತವೆಲ್ಲ ದೂರವಣ್ಣ |ಪ|

ಉದಯದಲೆದ್ದು ಸ್ನಾನವ ಮಾಡಿ | ಬಸವ ಬಸವಾ ಎಂದು ಜಪಿಸಿ |
ಇಷ್ಟಲಿಂಗ ಪೂಜೆಯ ಮಾಡಿ | ದುರಿತ ಕರ್ಮವ ಕಳೆಯಿರಣ್ಣಾ |1|

ಕಾಯಕವೇ ಕೈಲಾಸವೆಂಬ | ಬಸವ ನುಡಿಯ ಸಾಧಿಸಿರಣ್ಣಾ |
ದಯವೇ ಧರ್ಮದ ಮೂಲವೆಂದು | ಮರ್ಮ ತಿಳಿದು ನಡೆಯಿರಣ್ಣಾ |2|

ನಡೆಯುವಾಗ ನುಡಿಯುವಾಗ | ಕಷ್ಟದಲ್ಲಿ ಬಳಲುವಾಗ |
ದುಷ್ಟ ಜನರ ಕೈಗೆ ಸಿಲುಕಿ | ನಷ್ಟ ಪಡುವ ಸಮಯದಲ್ಲಿ |3|

ಎತ್ತ ನೋಡಿದಡತ್ತ ದೇವನ | ತೋರಿಸಿಕೊಟ್ಟಂಥ ಬಸವಾ |
ದೇಹವೆ ದೇಗುಲವನೆ ಮಾಡಿ | ದೇವರ ತೋರಿಸಿದ ಬಸವಾ |4|