ಬಾರೋ ಬಾರೋ ಬಾರೋ ಲಿಂಗ ಕರದ ಕಮಲಕೆ
|
|
- ✍ ಪೂಜ್ಯ ಶ್ರೀ ಮಹಾಜಗದ್ಗುರು ಡಾ|| ಮಾತೆ ಮಹಾದೇವಿ.
ಬಾರೋ ಬಾರೋ ಬಾರೋ ಲಿಂಗ ಕರದ ಕಮಲಕೆ
ಬಾರೋ ಬಾರೋ ಬಾರೋ ಲಿಂಗ ಕರದ ಕಮಲಕೆ
ಹೃದಯ ತಣಿಯೆ ಪೂಜಿಸುವೆ ನಿನ್ನಯ ಮೂರುತಿಯ || ಪ ||
ಭಕ್ತಿರಸದ ಉದಕವೆರೆದು | ಮರೆವನುರುಹಿ ಭಸ್ಮಪೂಸಿ
ಶಾಂತಿ ಎಂಬ ಗಂಧವಿಟ್ಟು | ನಾನು ತಣಿವೆನು || ೧ ||
ಸದುಗುಣ ಕುಸುಮಗಳ ಪದತಲದಿ ಅರ್ಪಿಸುತ
ಚಿದ್ಭಾವ ಧೂಪದ್‌ಹೊಗೆಯ | ನಾನು ಎತ್ತುವೆ || ೨ ||
ಅರಿವಿನಾ ಆರತಿಯ ಶಿರದ ತಳಿಗೆಯಲ್ಲಿ ಇರಿಸಿ
ಮರೆವ ಹರಿಪ ಮಹಾದೇವ ನಿನಗೆ ಬೆಳಗುವೆ || ೩ ||
ತನುಮನ ನೈವೇದ್ಯ ಲೋಕದಾತ ನಿನಗೆ ಇತ್ತು
ಎನ್ನ ಶರಣು ಬಿಡದೆ ಸಲಿಸಿ ಧನ್ಯಳಾಗುವೆ || ೪ ||
ಅಂಗೈಯ ತೊಟ್ಟಲಲಿ ಲಿಂಗಯ್ಯ ನಿನ್ನ ಮಲಗಿಸಿ
ಸಂಗೀತ ಹಾಡುವೆ ಲಾಲಿ ಹೇಳಿ ಆಡಿಪೆ || ೫ ||
ಆಡಿಪಾಡಿ ನಲಿದಾಡಿ ಮಿತಿಮೀರಿ ತಣಿದಾಡಿ
ನೋಡಿ ಸವಿವೆ ಕಂಗಳಲ್ಲಿ ಸಚ್ಚಿದಾನಂದನ || ೬ ||
