ಮಂತ್ರ

ಮಂತ್ರ

ಅಷ್ಟಾವರಣಗಳಲ್ಲಿ ಒಂದಾದ ಮಂತ್ರಕ್ಕೆ ಲಿಂಗಾಯತಧರ್ಮದಲ್ಲಿ ಒಂದು ವಿಶಿಷ್ಟಸ್ಥಾನವಿದೆ. ಇಲ್ಲಿ ಮಂತ್ರವೆಂದರೆ ಓಂ ಲಿಂಗಾಯ ನಮಃ ಎಂಬ ಆರಕ್ಷರದ ಮಂತ್ರವಾಗಬಹುದು. ಅಥವಾ ಲಿಂಗಾಯ ನಮಃ (ಅಥವಾ ಶಿವಾಯ ನಮಃ) ಎಂಬ ಐದಕ್ಷರದ ಮಂತ್ರವಾದರೂ ಆಗಬಹುದು. ಲಿಂಗದೀಕ್ಷಾ ಸಮಯದಲ್ಲಿ ಗುರುವು ಶಿಷ್ಯನ ಕಿವಿಯಲ್ಲಿ ಪಂಚಾಕ್ಷರಿ ಮಂತ್ರವನ್ನು ಉಸುರಿ, ಅದನ್ನು ತಪ್ಪದೆ ಉಚ್ಚರಿಸುವಂತೆ ಬೋಧಿಸುತ್ತಾನೆ.

ಮಂತ್ರವೆಂದರೆ ದೈವವನ್ನು ಮನಸ್ಸಿನಲ್ಲೆ (ಮನ್) ಇಟ್ಟುಕೊಳ್ಳುವ, ಅಥವಾ ಮನನ ಮಾಡಿಕೊಳ್ಳುವ ಒಂದು ತಂತ್ರ, ಲಿಂಗಪೂಜಾ ಸಮಯದಲ್ಲಷ್ಟೇ ಅಲ್ಲ, ಯಾವಾಗಲೂ ಪರಶಿವನನ್ನು ನೆನೆಯಬೇಕು ಎಂಬ ಉಪದೇಶ ಮಂತ್ರ ಸಿದ್ಧಾಂತದಲ್ಲಿ ಅಡಗಿದೆ. ಲಿಂಗವನ್ನು ಯಾವಾಗಲೂ ಪೂಜಿಸಲು ಸಾಧ್ಯವಿಲ್ಲವೆಂದ ಮೇಲೆ, ಕೊನೆಗೆ ನೆನೆಯಲಿಕ್ಕಾದರೂ ಸಾಧ್ಯಮಾಡಿಕೊಳ್ಳಬೇಕು. ಹಾಗೆ ನೆನೆಯಲು ಸಾಧ್ಯವಾಗುವುದು ಮಂತ್ರದ ಮೂಲಕ. ಆದರೆ ಮಂತ್ರವನ್ನು ಯಾಂತ್ರಿಕವಾಗಿ ಉಚ್ಚರಿಸದೆ, ಮನಃ ಪೂರ್ವಕವಾಗಿ ಉಚ್ಚರಿಸಬೇಕು. ಹೀಗೆ ಪರಶಿವನನ್ನು ಯಾವಾಗಲೂ ನೆನೆಯುವುದರಿಂದ ಎರಡು ಫಲಗಳುಂಟಾಗುತ್ತವೆ.

೧. ಯಾವಾಗಲೂ ಪರಶಿವನನ್ನು ಮಂತ್ರದ ಮೂಲಕ ನೆನೆಯುವವನು ಅಧಾರ್ಮಿಕ ಮತ್ತು ಅನೈತಿಕ ಚಟುವಟಿಕೆಗಳಲ್ಲಿ ನಿರತನಾಗಿರುವುದಿಲ್ಲ, ಅಥವಾ ಆದಷ್ಟೂ ಅವುಗಳನ್ನು ದೂರ ಮಾಡಲಿಚ್ಛಿಸುತ್ತಾನೆ. ಅಂತೂ ಇದರಿಂದ ಆದಷ್ಟೂ ಶುದ್ಧನಾಗಲು ಪ್ರಯತ್ನಿಸುತ್ತಾನೆ.

೨. ಯಾವಾಗಲೂ ಶಿವನನ್ನು ನೆನೆದು, ತಾನು ಮಾಡುವುದೆಲ್ಲವೂ ಶಿವಾರ್ಪಿತವೆಂದು ಬಗೆದು, ಭಕ್ತನು ಪ್ರಾಣಲಿಂಗಿಯಾಗುತ್ತಾನೆ. ಹಾಗೂ ಅಂಥ ಮನಶುದ್ಧಿಯನ್ನು ಸಾಧಿಸಿದವನಿಗೆ ಅನುಭಾವದ ಮೂಲಕ ಲಿಂಗೈಕ್ಯ ಸಾಧ್ಯವಾಗುತ್ತದೆ.

ಕೆಲವು ವಚನಕಾರರ ಪ್ರಕಾರ, ಲಿಂಗಾಯ ನಮಃ ಎಂಬ ಅಕ್ಷರಗಳು ಪರಶಿವನಿಂದಲೇ ಉದ್ಭವಿಸುತ್ತವೆ ಹಾಗೂ ಪಂಚಭೂತಗಳು ಈ ಅಕ್ಷರಗಳಿಂದ ಉದ್ಭವಿಸುತ್ತವೆ.

೧. ಜಪ, ಪೂಜೆ, ಹೋಮ ಮೊದಲಾದ ಸಂದರ್ಭದಲ್ಲಿ ಪಠಿಸುವ, ದೇವತಾಸ್ತುತಿ ರೂಪದಲ್ಲಿರುವ ಪವಿತ್ರಾಸಮೂಹ; “ಓಂ ನಮಃ ಶಿವಾಯ" ಎಂಬುದು ಷಡಕ್ಷರಗಳುಳ್ಳ ಮಂತ್ರ. ಇದರಲ್ಲಿ "ಓಂ" ಎಂಬುದನ್ನು ಹೊರತು ಪಡಿಸಿದರೆ ಪಂಚಾಕ್ಷರೀಮಂತ್ರವಾಗುತ್ತದೆ. ಇವೆರಡೂ ಬೀಜಮಂತ್ರಗಳು. "ಓಂ" ಎಂಬುದರಲ್ಲಿ ಅಕಾರ ಉಕಾರ ಮಕಾರಗಳು ಸೇರಿವೆ. ಈ ಮೂರು ಅಕ್ಷರಗಳನ್ನು ವ್ಯತ್ಯಾಸ ಮಾಡಿದಲ್ಲಿ "ಈ ಮಾ" ಎಂದಾಗುತ್ತದೆ. ಹಾಗಾಗಿ "ಓಂ" ಎಂಬುದು ಶಿವಶಕ್ತಿಯರ ಸಂಕೇತರೂಪವಾದ ಮಂತ್ರವಾಗಿದೆ. ದೀಕ್ಷಾಕಾಲದಲ್ಲಿ ಗುರುವು ತನ್ನ ಶಿಷ್ಯನ ಕಿವಿಯಲ್ಲಿ ಈ ಮಂತ್ರಗಳನ್ನು ಉಪದೇಶಿಸಿ ಆತನನ್ನು ಮಂತ್ರಕಾಯನನ್ನಾಗಿ ಮಾಡುತ್ತಾನೆ ; ಎನ್ನ ಮನದಲ್ಲಿ ಮತ್ತೊಂದನರಿಯೆನಯ್ಯಾ ಓಂ ನಮಃ ಶಿವಾಯ ಓಂ ನಮಃ ಶಿವಾಯ ಎನಗಿದೆ ಮಂತ್ರ ಇದೇ ಜಪ (ಬಸವ. ಸಮವ. ೧-೨೩-೮೦); ಮಂತ್ರದ ಕಲಿತಡೇನು ಪುರಶ್ಚರಣೆಯ ಮಾಡಿದಲ್ಲದೆ ಸಿದ್ಧಿಸದು (ಅಲ್ಲಮ. ಸಮವ. ೨-೪೨೭-೧೩೩೮); ಮಂತ್ರವೆ ಅವಯವಂಗಳಾಗುಳ್ಳ ಪರಶಿವಂಗೆ ನಾದವೆ ಕಿರೀಟ ...ಮಂತ್ರಮೂರ್ತಿಯಾದ ಪರಶಿವನು ಮಂತ್ರಾರ್ಥಿಗಳಿಗೆ ಮಂತ್ರಸಿದ್ಧಿಯ ಕೊಡುವ ದೇವ (ಚೆನ್ನಬ. ಸಮವ. ೩-೫೫೫-೧೫೦೨).

೨. = ಮಂತ್ರಯೋಗ ೨ ; ಮಂತ್ರ ಹಟ ಲಯ ರಾಜಯೋಗದ ಸಂತೆಗಳ ಶಬ್ದಗಳ ಜಾಣರು ಯಂತ್ರವಾದಿಗಳು ...ಬರಲಮ್ಮರು (ಪ್ರಭುಲೀ, ೨೧-೨೯).

೩. ಆಚಾರಲಿಂಗಕ್ಕೆ ಸಂಬಂಧಿಸಿದ ಕ್ರಿಯೆ, ಮಂತ್ರ, ನಿರೀಕ್ಷಣ, ಯಜನ, ಈಳನ, ವೇಧಾ ಎಂಬ ಆರು ಹಂತಗಳಲ್ಲಿ ಒಂದು; ಪಂಚಾಕ್ಷರೀಮಂತ್ರವನ್ನು ಜಪಿಸುವುದು ; ಷಡ್ವಿಧ ಆಚಾರಲಿಂಗ -ಇವು ಕ್ರಿಯೆ, ಮಂತ್ರ ...ವೇಧಾ ಎಂದಿರುತ್ತವೆ ...ಆಚಾರಲಿಂಗವು ಮಂತ್ರಾತ್ಮಕವಾಗಿದ್ದು ಪಂಚಾಕ್ಷರೀಮಂತ್ರ ಸ್ಮರಣ ಮಾಡುವುದೇ ಇದರ ಲಕ್ಷಣವಾಗಿರುತ್ತದೆ (ಶಿವಾಕೋ, ೬೨-೭೦).