ರಚನೆ: ಶ್ರೀಗುರು ಬಸವಾರ್ಯರು
ಬಸವಾಕ್ಷರವನೆಲ್ಲ ವಶನಾಗಿ ನೆನೆದು ನೀ
ಅಸಮಾಕ್ಷನೊಳು ಬೆರೆದು ಹಾಡಿರಣ್ಣ || ಪ ||
ಆವಾಗ ಬಸವನೆಂದಾವಾಗ ನೆನೆವವರ
ಭಾವದೊಳು ನೆಲೆಸಿತೀ ಬಸವಾಕ್ಷರ
ಆವಾಗ ಬಸವ ಬಸವಾಯೆಂದು ಹಾಡುವರ
ಕಾವುತೀರ್ಪುದು ತಾನೆ ಬಸವಾಕ್ಷರ || ೧ ||
ಬಸವ ಬಸವಾಯೆಂದು ಅಸಮ ಶರಣರನೆಲ್ಲವ
ವಶಮಾಡಿಕೊಂಡಿಹುದು ಬಸವಾಕ್ಷರ
ಬಸವವೆಂದವರೆಲ್ಲ ಅಸು ಲಿಂಗದಲ್ಲಿ ಬೆರೆದು
ವಶನಾಗಿ ತೋರಿತೀ ಬಸವಾಕ್ಷರ || ೨ ||
ನೆನೆದು ನೋಡಿರೆ ಒಮ್ಮೆ ಬಸವಾಕ್ಷರವ ನೀವು
ಅನುಪಮನ ಮಾಡುವದು ಬಸವಾಕ್ಷರ
ಅನುವರಿದು ಬಸವ ಬಸವ ಎಂದಡೆ ತನ್ನ
ಮನಸಿಜನ ಸುಡುವದೀ ಬಸವಾಕ್ಷರಾ || ೩ ||
ಏನ ಮಾಡಿದಡೇನ ಮಾನಸದಿ ನೆನೆದೊಮ್ಮೆ
ಧ್ಯಾನಿಸುತ ನೆನೆಯಿರೈ ಬಸವಾಕ್ಷರ
ಸ್ವಾನುಭಾವದಿ ಶಿವನ ಭಜಿಸಿದಡೆಯು
ಮಾನಸದಿ ಜಪಿಸಿರೈ ಬಸವಾಕ್ಷರ || ೪ ||
ಪರಮಶಿವನೊಲುಮೆಯನ್ನು ಬೆರೆಸಿ ಬೇಕಾದಡೆಯು
ಪರಮನೆ ತಾನಾಗಿಹುದು ಬಸವಾಕ್ಷರ
ಪರಮ ಪರಮನೆ ನಿತ್ಯ ಗುರುಬಸವನೆಂದೆನುತ
ಪರಕಿಸುತ ನೋಡಿರೈ ಬಸವಾಕ್ಷರ || ೫ ||
ಗ್ರಂಥ ಋಣ:
1. ಡಾ. ಎಲ್. ಬಸವರಾಜು ಸಂಪಾದಿತ “ಶಿವದಾಸ ಗೀತಾಂಜಲಿ”
2. ಕೆ. ರವೀಂದ್ರನಾಥ ಸಂಪಾದಿತ “ಬಸವಯುಗದ ವಚನೇತರ ಸಾಹಿತ್ಯ”
