 | ಸಾರೆ ಚಲ್ಯಾದೆ ಮುಕುತಿ | ಅಕ್ಕಮಹಾದೇವಿ ಯೋಗಾಂಗ ತ್ರಿವಿಧಿ |  |
ಮಾತಿನ ಬಳಕೆಯಲ್ಲದೆ... |
ರಾಗ: ವಸಂತ
ಮಾತಿನ ಬಳಕೆಯಲ್ಲದೆ ತ್ರಿವಿಧದಿ
ಸೋತು ಸೈರಿಸುವ ಸದ್ಗುಣಿಗಳುಂಟೆ ||ಪ||
ರಸದಾಳಿಯ ಕಬ್ಬಿನ ಸರಿಯೆಂದು ಹಚ್ಚ
ಹಸಿಯ ಬಿದಿರ ಮೆಲ್ಲುವನಂತೆ
ರಸನೆ ಒಡೆದು ಹಲ್ಲು, ಮುರಿದಂತೆ ಭಕ್ತಿ
ವಶವಲ್ಲದೆ ತ್ರಿವಿಧ ವಂಚಕರಿಗೆ ||೧||
ಮೂರುವಿಡಿದು ಮೂರನರಿವುದು ಮತ್ತೆ
ಮೂರುವಿಡಿದು ಮೂರ ಬಿಡುವುದು
ಮೂರೊಂದು ರೂಪೆಂದರಿವುದು ಇನ್ನು
ಬೇರೆಂಬರ ನಾನೇನೆಂಬೆ ||೨||
ಬಾಣತಿಯಂತೆ ಭಕ್ತಿಯಗುಣ ಇಷ್ಟ
ಪ್ರಾಣಲಿಂಗಾಂಗ ಸಂಗದೋಳಿಹ
ಜಾಣನು ಸಕಲ ಕಲೆಯೋಳಿಹ ನಿ
ರ್ವಾಣಿಯ ನೆಲೆಯಳವಡುವುದೆ ||೩||
ಪಂಚಾಚಾರವಿಡಿದು ಭಕ್ತಿ ನಿ
ರ್ವಂಚಕನಾದಡೆ ಅದು ಮುಕ್ತಿ
ಸಂಚಲಿಸುವ ಮನವಳಿದೊಡೆ ನಿಃಪ್ರ
ಪಂಚನ ಬೆರೆಸುವುದರಿಂದಲ್ಲ ||೪||
ನುಡಿಯಬಹುದು ಅದೈತವ ಒಮ್ಮೆ
ನಡೆಯಬಾರದು ನಿರ್ಧರವಾಗಿ
ನುಡಿದಂತೆ ನಡೆವ ಮಹಾತ್ಮರ ಪಾದ
ವಿಡಿಸು ಕಪಿಲಸಿದ್ದಮಲ್ಲೇಶ್ವರ ||೫||
(ಈ ಸ್ವರವಚನವನ್ನು ಡಾ. ಕೆ. ರವೀಂದ್ರನಾಥ ಸಂಪಾದಿತ “ಬಸವಯುಗದ ವಚನೇತರ ಸಾಹಿತ್ಯ” ಕೃತಿಯಿಂದ ಆಯ್ದುಕೊಳ್ಳಲಾಗಿದೆ)
*| | ಸಾರೆ ಚಲ್ಯಾದೆ ಮುಕುತಿ | ಅಕ್ಕಮಹಾದೇವಿ ಯೋಗಾಂಗ ತ್ರಿವಿಧಿ | |